Ah was walkin' doun de road inna Salem, Oregon
not causin' no fuss, not no disturbancy
Jus' walkin' out a road
mindin' I personality
when Ah come up pon a ol' man by de Library
Now disya ol' guy never notice I approachin'
until Ah come right up pon 'im
an' when 'im finally tek notice
is like it is a duppy 'im sight
'im freeze up
jaw drop
eyes pop open
An' as Ah walk pass me seh, "Wha'ppen, Grampa
fus time yuh ever buck up pon a dread?"
Yuh know weh dem seh,
Dread flash 'im locks
an' a weakheart drop
Me a lucky 'im doan 'ave 'eartattack
dem prably would a carry I doun a station
fe murdah
Tek off yuh tam out a road
inna Salem, Oregon
road block appear
traffic get jam